Job 32

Inkulumo ka-Elihu

1 Kwathi-ke amadoda la womathathu acina ukuphendula uJobe ngokuba wayelungile ngokubona kwakhe.

2 Kodwa u-Elihu indodana kaBharakeli umBhuzi, owendlu kaRamu, wamzondela uJobe ngokuzigeza yena hatshi uNkulunkulu.

3 Wayebazondele njalo abangane labo abathathu ngokuba babengayitholanga indlela yokuphikisa uJobe kodwa bemlahlile ngokumsola. 4 Kodwa u-Elihu wayeke waqala wema wathula ukukhuluma loJobe ngokuba babebadala kulaye. 5 Kodwa kwathi esebona ukuthi wonke amadoda womathathu ayengaselalutho njalo ayengalutsho, ulaka lwakhe lwavuka.

6 Kwathi-ke u-Elihu indodana kaBharakeli umBhuzi wathi: “Ngimncinyane ngeminyaka, lina libadala; yikho bengisesaba, ngithikaza ukutsho engikwaziyo.

7 Ngikhumbule ngathi, ‘Kakukhulume ubudala; iminyaka yokukhula kayifundise ukuhlakanipha.’

8 Kodwa kungumoya osemuntwini, ukuphefumula kukaSomandla, okumupha ukuqedisisa.

9 Kasibo bodwa abadala abahlakaniphileyo, kasibo bodwa abalupheleyo abezwisisayo okulungileyo.

10 “Ngakho ngithi: Lalelani kimi; lami ngizalitshela engikwaziyo.

11 Bengithule lisakhuluma, ngikulalele ukucabanga kwenu; lathi lisadinga amazwi,

12 ngalilalela ngokupheleleyo. kodwa kakho lamunye kini otshengise ukuthi uJobe ulahlekile; kakho omunye wenu osephendule imibono yakhe.

13 Lingaze lathi, ‘Sesikutholile ukuhlakanipha; uNkulunkulu kamehlule, hatshi umuntu.’

14 Kodwa uJobe kakaqondisisi amazwi akhe kimi, futhi kangiyikumphendula ngendlela yenu yokuphikisa.

15 “Sebededile kabaselakho okunye abangakutsho; sebesilela amazwi.

16 Ngike ngime na njengoba sebethule, sebemi nje laphayana bengaselampendulo?

17 Lami ngisake ngikhulume; Lami ngizakutsho engikwaziyo.

18 Ngokuba manengi amazwi engilawo, umoya ongaphakathi kwami uyangifuqa;

19 ngaphakathi ngiyafuthelana njengewayini elivalelwe embodleleni; njengemixhaka yewayini esifuna ukudubuka.

20 Ngimele ngikhulume ukuze ngibhodle; ngimele ngivule izindebe zami ngiphendule.

21 Kangizukutshengisa ubandlululo loba kukubani, futhi kangisoze ngiyenge muntu;

22 ngokuba ngabe ngangiyingcitshi yokuhuqa udaka emehlweni, uMenzi wami wayezangisusa masinyane.